最近因為新竹市市長林智堅提出新竹縣、市合併改制直轄市ê想法，引起社會各界ê關心佮討論，這ê議題嘛顯示合理劃分臺灣行政區域的重要。就新竹縣、市ê立場來講，會當整合做一个都會區，對城市ê久長發展有真大ê幫贊，毋過若是干焦考慮單獨地方自治體ê改制，恐驚見無夠全面，行政區劃需要閣較深入ê討論。

首都效應ê角度觀察改制議題

行政區劃ê劃分佮首都ê地理位置有一定ê牽連，臺北成做臺灣政治中心已經有真久長ê時間，資源過度集中，大量人口遷徙，予臺北變做全臺上顯目的城市，臺北四箍圍ê縣、市嘛綴咧發展，年久月深，臺灣人口ê分佈出現了重頭輕ê狀況，所以北臺灣目前有三个直轄市，新竹縣、市因為科技園區ê關係，加上新竹縣、市是首都圈ê一部分，怹想欲合併爭取改制做直轄市ê願望，應當會當理解。

毋過新竹縣、市就算合併，伊ê人口數嘛猶無法度符合《地方制度法》改制做直轄市ê規定，因此愛閣透過修法才有法度達成改制直轄市ê目標，算是真厚工ê工課，其實彰化縣這馬ê人口數會當符合改制直轄市ê條件，但是彰化縣目前並無改制ê拍算，可見行政區劃ê議題猶有誠大思考佮參詳ê空間。

多直轄市制ê規劃

臺灣ê行政區劃對以早「一省兩市」ê時代，行政區劃是採取「城鄉分立」劃分方式，到馬英九總統執政ê時陣，才以「三都十五縣」藍圖推捒行政區劃ê改革，拍破「城鄉分立」改做「城鄉合一」，落尾變做「五都」、「六都」，已經佮進前ê規劃有真大ê精差，真䆀看出行政區劃ê原則佇佗位，新竹縣、市合併改制直轄市ê議題嘛會當看做改革無徹底所留落來ê問題。

因為制度設計ê關係，致使直轄市比縣（市）有較大ê人事權佮財政權，一寡縣（市）就會想欲透過改制直轄市ê方式來提昇本身ê地位，爭取較濟ê資源，甚至改制直轄市變做一種時行，因此，直轄市會成做地方自治ê主流，所以必須愛針對直轄市制度進行全盤ê檢討。若是對法律ê角度來講，《中華民國憲法》第118條規定：「直轄市之自治，以法律定之。」直轄市自治雖然無親像縣（市）按呢受著憲法層次ê保障，毋過憲法對地方制度ê設計若毋是佮臺灣ê狀況真鬥搭，直轄市ê制度顛倒提供較好伸勼ê運作空間。

咱若是徛佇直轄市ê立場來思考，我認為會當採取多直轄市ê規劃（黃建銘，1999），譬喻將臺灣本島佮四箍輾轉ê島嶼，以臺北、新竹、臺中、嘉義、高雄佮花蓮為中心，劃分做六个直轄市左右，負責目前迒區域ê事務，有學者嘛有sio-siâng ê看法（張其祿，2018)。直轄市下跤會當針對伊管轄範圍ê需要，參考立法委員、縣（市）議員ê選區、地政佮警察分局ê分區，kā這馬ê鄉、鎮、市佮區進行整合，分做幾个區抑是鄉、鎮，實施自治，來表達地方ê民意，強化地方ê認同，形成中央─直轄市─區、鄉、鎮ê三級體制，按呢毋但有處理迒區域性事務ê功能，嘛聽好反映地方聲音，成做兼顧整合性佮多元性ê行政區劃體系。

參考文獻
張其祿，2018，〈六都劃分還需完善 北北基早該一體〉，《Yahoo論壇》。
黃建銘，1999，〈臺灣地區行政區劃調整策略：多直轄市制之構想〉，《人事管理》， 423：14-22。

圖片來源： Vecteezy